كتبت ـ بسمة البوهي
أظهرت الفنانة نيللي كريم سعادتها بالمشاركة في فيلم “Happy Birthday”، مشيرة إلى أن الفكرة لمست قلبها، وأن ارتباطها بالمشروع بدأ من أول سطر في السيناريو، دون الحاجة إلى قراءة تفاصيل أكثر.
وأوضحت نيللي خلال استضافتها في برنامج “معكم منى الشاذلي”، مع الإعلامية منى الشاذلي: “الفكرة نفسها لمست قلبي من أول سطر، مكنتش محتاجة أعرف التفاصيل على قد ما السطر شدني، لما اتبعتلي الاسكريبت سألتهم عن إيه، فالسطر ده كان يكفي إني أقولهم يلا هنصور أمتى؟ ما فكرتش كتير، لأني كنت حابة المشروع كله”.
وأضافت: “الفيلم ميزته أن كل شخصية فيه بطل، لو شيلتي شخصية من الأحداث الفيلم هيهتز، وده بيدل على عمق الكتابة”.
وأوضحت علاقتها بمخرجي ومؤلفي العمل محمد دياب وسارة جوهر، التي بدأت منذ فيلم “678”، والذي كان أولى تجارب “دياب” الإخراجية، ثم تعاونت معه مجددًا في “اشتباك”، مضيفة: “محمد دياب وسارة دائمًا بيشتغلوا كفريق، وسارة دايمًا كانت الجندي المجهول في كل مشاريعه، ولما قررت سارة تخرج، قلت لها: أنا معاكي”.
وقالت: “أوقات مكنش بيبقى عندي تصوير، فكنت بقعد أتفرج على الشغل على المونيتور، أنا بحب الإخراج، وكنت بستمتع وأنا قاعدة، لأني حاسة أن الفيلم ده بتاعي، وكل اللي كان يهمني أن الفيلم ده يطلع للنور والناس تشوفه”.
