حوار تحية محمد
في البداية نود التعرف على حضرتك
رضا حسن تعليب
معلم خبير،حالياً مدير المدرسة
ماهي استعدادات المدرسة للعام الدراسي الجديد 2026؟
الاستعدادات بدأت من شهر 7. عملنا صيانة شاملة للفصول و الحمامات، و. راجعنا الكثافة، السنة دي عندنا ٢٦ فصل، ومتوسط الكثافة 45 طالب في الفصل.
كما تم تفعيل خطة الأنشطة والجداول عشان الطالب يحس بالالتزام من البداية.
ماهي أكبر التحديات التي تواجه المدرسة الابتدائية حالياً؟
الكثافة ،كل ما قلت الكثافة كل ما قدرنا نهتم بالطالب أكتر، دور ولي الأمر، فيه أولياء أمور متابعين جداً، وفيه ناس سايبة كل حاجة على المدرسة والتعليم مشاركه.
وبالنسبة للمناهج الجديدة وتطوير التعليم، رؤيتك لها، كيقيتها مع تلاميذ ابتدائي؟
المناهج الجديدة ممتازة ،تعتمد على الفهم والمهارات مش الحفظ.
بس محتاجة تدريب للمعلمين وتوفير وسائل ،احنا عملنا ورش داخل المدرسة كل أسبوع عشان المعلمين يتبادلوا خبرات في استخدام الاستراتيجيات الجديدة زي التعلم باللعب والمشروعات.
موضوع التنمر والعنف بين التلاميذ بقى يظهر بدري، تتعامل معاه ازاي؟
دي نقطة مهمة جداً، عندنا أخصائي اجتماعي اخصائي نفسي متابع.
أول ما نلاحظ أي سلوك يستدعي ولي الأمر فوراً.
وعملنا “برلمان مدرسي” و”إذاعة مدرسية” يومية عن القيم ،الهدف نخلي المدرسة بيئة آمنة ،الطفل اللي يتنمر غالباً محتاج احتواء مش عقاب بس.
رسالة أخيرة تحب توجهها لأولياء الأمور؟
بقولهم إن المدرسة مش حضانة ولا سجن، المدرسة شريك، تابع ابنك في الواجب و الكشاكيل، اسأل عليه، احضر اجتماعات أولياء الأمور، لما البيت والمدرسة يتفقوا، الطالب هو اللي يكسب.
شكراً لحضرتك على وقتك
العفو. وأتمنى سنة دراسية موفقة لكل ولادنا.
وبالحديث مع الاستاذة سمر زيدان الاخصائي النفسي بالمدرسة
مع بداية العام الدراسي، تبرز أهمية الدور النفسي داخل المدارس خاصة في المرحلة الابتدائية التي تتشكل فيها شخصية الطفل.
ما هي أكثر المشكلات النفسية شيوعاً بين تلاميذ ابتدائي؟
نقابل 4 مشكلات متكررة:
التنمر، سواء كان تنمر لفظي أو جسدي ،الطفل المتنمر غالباً يعاني في بيته من عنف أو إهمال.
الخوف والقلق من الامتحانات، حتى في سنة ثالثة ورابعة الأهالي ضغطوا جامد وده بيعمل رهبة.
فرط الحركة وتشتت الانتباه، بي تلخبط مع الشقاوة، نحتاج نفرق ونتابع مع ولي الأمر.
كيف تتعاملون مع حالة تنمر داخل المدرسة؟
أول خطوة فصل الطرفين فوراً. بعدها جلسة فردية مع الطفل المتنمر عليه عشان أرفع ثقته بنفسه، وجلسة مع الطفل المتنمر أعرف سبب سلوكه.
ما دور الأخصائي النفسي اللي الناس مش فهماه؟
ناس كتير فاكرة الأخصائي ده “بتاع المجانين”، لا، أنا دوري وقائي قبل ما يكون علاجي.
بعمل ندوات عن إدارة الغضب، صداقة آمنة، إزاي تقول “لا”، وبعمل ملف لكل طالب متكرر المشاكل عشان نتابع مع المدرس وولي الأمر. هدفي أطلع طالب سوي نفسياً يقدر يتعلم.
رسالة توجهها للأم والأب؟
اسمع ابنك، 10 دقايق في اليوم بدون موبايل، اسأله “إيه أكتر حاجة ضايقتك النهاردة؟
بلاش ضرب وإهانة، الطفل اللي يتهان يتعلم يكذب و يخبئ.
تابع مع المدرسة، لو الأخصائي طلبك تعال، احنا مش نشتكي، احنا نلحق المشكلة قبل ما تكبر.
شكرا لإدارة المدرسة على حسن تعاونهم معنا لنشر ثقافة المدارس
