ــــ
شعر/ وليد المصرى
ـــــ
يابحر بسيط مانيش فاعل
ولا مفعول بيتسيط ويتجامل
أنا الفعل اللى صان عهدك
وعاش بالحب يتعامل
مابين عشقى وكونى هويس
بشوف الصوره واتفاعل
وبتغير مع الأحاسيس
محدش عمره كان كامل
أشوف ليلى بتعشق قيس
وأتوه وأسرح فى مملكتك
بقيت واحد من المهاويس
بينبض قلبه من قلبك
وبيحارب فى كل خسيس
يحطم فيكى ويذل لك
ياحب وعشق م المواريث
بحبك حب موصوف لك
ومكتوب لى بدون تأسيس
أكون فارس يشيل إسمك
وأكون ليكى بطل ورئيس
وحلمه يعيش مع سيرتك
يحوش عنك كتير كوابيس
ولا يكونشى فى يوم خصمك
مانيش كومبارس فى الكواليس
وبيمثل فى دور عاشقك
أو حد م المحابيس
بيبيع ويشترى فى جسمك
أنا أحمس وعنخ آمون ورمسيس
أنا أزوريس ياست إيزيس
وكل اللى يوم عشقك
فكونى ذى ما تكونى
وعيشى للى يخلص لك
ــ
