كتبت – أسماء حليمة
كشف الفنان محمد مرزبان، تفاصيل مشاركته في مسلسل سوق الكانتو، الذي عُرض في الموسم الرمضاني الماضي.
وقال محمد مرزبان، في حواره بـ برنامج الستات مايعرفوش يكدبوا: “كان نفسي اشتغل مع المخرج حسين المنباوي، وقابلته في مرة وقت ما كان بيصور فيلم مع أمير كرارة، وقولته إحنا مش هنشتغل مع بعض ولا إيه؟ أنا عايز أغير جلدي، وبعتلي دور الخواجة في مسلسل سوق الكانتو”.
وتابع الفنان: “أنا نفسي أعمل دور شعبي ابن بلد، لأن مش كل الشعبيين زي النماذج الخارجة اللي بتظهر في الأعمال، أنا كل يوم جمعة باخد الموتوسيكل بتاعي وبنزل أقف على عربية فول مع أصحابي، وأنا بحب ده وبحب أروح أكل في السيدة زينب”.
وأضاف “مرزبان”: “أول عمل ليا كان اسمه أرملة و4 بنات، معرفش حد يفتكره ولا لأ، وكان وقتها استوديوهات عارين في الزمالك، وكان مدير الإنتاج أستاذ محمد زعزع كان صاحب فضل عليا، واشتغلت فيه مع الأستاذ الراحل عمر الحريري”.
وجدير بالذكر أن الفنان محمد مرزبان كشف في وقت سابق عن رفضه لأحد الأدوار بسبب قيمه الأخلاقية، قائلًا: “رفضت زمان دور كان مهم جدًا ولكن مكنش ينفع أعمله لأنه مكنش من مبدأي إني أعمل كده، لأني أب لـ بنتين وكان لازم أحافظ على سمعتهم، وقولت مش هعمله حفاظًا على سمعة بناتي.. وقولت ليه أخلي يوم في الأيام يتقال لبناتي مش إنتي بنت فلان؟ لأن في ناس بتصدق الأدوار”.
