كتبت – بسمة غربية
أعربت الفنانة إلهام شاهين عن سعادتها بنجاح مسلسلها الأخير “الفريدو”، الذي يعرض حاليًا على قناة On، مشيرةً إلى إنها تحمست لتقديم مرض ألزهايمر بشكل كبير.
وتحدثت إلهام شاهين من خلال لايف للإعلامية بوسي شلبي، عبر حسابها الرسمي بموقع انستجرام: “ردود الأفعال على الفريدو جميلة وبشكر كل زمايلي والجمهور والنقاد، وأنا بيستفزني وبيزود جوايا التحدي، الأدوار السايكو دراما اللي فيها حاجة عقلية”.
وأكملت إلهام شاهين: “بتستهويني جدا النوعية دي من الأدوار وبدرسها كويس، وأنا قريت في علم النفس والمرض ده تحديدًا كان شاغلني، لأني شوفت كتير من زمايلنا وفنانين عانوا من الزهايمر، وبدأت أسأل ليه الفنانين بيحصلهم كده في نهاية حياتهم، وأنا اتفقت على الدور قبل ما أقراه حتى”.
وقالت إلهام شاهين: “أنا في المطلق سخيفة لما بيتعرض عليا أدوار، ومش بقول إني متحمسة وبقعد أقولهم لا لازم ألاقي حاجة جديدة لأني عملت كل حاجة خلاص”.
وأردفت الفنانة: “لكن لما المنتج قالي دور واحدة عندها زهايمر قولتله من غير ما أقرا أنا مضيت أهو، ومش بيهمني أتواجد كل سنة لأني مش واخدة التمثيل مهنة وأنا مجنونة تمثيل”.
وتابعت الفنانة: “أنا بدأت اظبط شكل الشخصية من أول ما قالولي زهايمر، قبل التصوير بشهرين، فخدت مني فترة تحضير وبحث، برغم إن مكنش غريب عليا الشخصية لأني عيشت مع ناس كتير عندهم زهايمر وفنانين وده مخزون بيبقى جوانا”.
وجدير بالذكر أن مسلسل “الفريدو”، مأخوذ عن كتاب 55 مشكلة حب للدكتور مصطفى محمود، ويعرض الآن على قناة on، وهو من بطولة الفنانة إلهام شاهين، وإخراج عصام نصار.
