كتبت ـ آلاء الدسوقي
كشف الكابتن بدوي السيد، المدير الفني لنادي الزهور المطروحي، المنافس بدوري القسم الثالث “ممتاز ب”مجموعة الإسكندرية البحري، عن رؤيته الفنية لأسلوب اللعب، وتوقعاته للدوري المصري، وتقييمه لأداء منتخب مصر خلال الفترة الأخيرة.
في البداية قال بدوي السيد: “أنا مدرب بميل للهجوم، لكن في نفس الوقت سير المباراة هو اللي بيفرض عليك أسلوبك، ممكن تبدأ هجومي وتتحول لدفاعي أو العكس، وكل ده بيكون حسب متطلبات اللقاء والهدف اللي عايز توصله سواء تعادل أو فوز”.
وأضاف: “كرة القدم مش ثبات على طريقة واحدة، بالعكس لازم تكون مرن، وتقرأ المباراة كويس، لأن التفاصيل الصغيرة هي اللي بتفرق في النتيجة”.
أفضل اللاعبين في الدوري المصري
كشف بدوي السيد:”ناصر منسي لاعب نادي الزمالك من المهاجمين المميزين جدًا، وبيقدم أداء قوي وفعال مع فريقه”.
توقعاته لبطل الدوري
أوضح:”الزمالك قريب جدًا من حسم الدوري، لكن توقعي الشخصي إن النادي الأهلي ممكن يحسمها في النهاية، لأنه دايمًا عنده خبرة البطولات”.
أفضل حارس مرمى
أضاف: “محمد علاء حارس الجونة من الحراس المميزين جدًا، وبيقدم مستويات ثابتة وبيطور من نفسه بشكل واضح”.
وعن رأيه في منتخب مصر تحت قيادة الكابتن حسام حسن
تابع بدوي السيد: “المنتخب بدأ يرجع لمستواه تدريجيًا، وبنشوف روح قريبة من جيل الكابتن حسن شحاتة، وده شيء مهم جدًا”.
وأشار: “النتائج الأخيرة بتأكد إن في تطور واضح، من الوصول لنصف نهائي أمم أفريقيا، والتأهل لكأس العالم، وده مؤشر قوي إن المنتخب ماشي في الطريق الصح”.
ولفت: “مباراة السعودية كانت سيطرة كاملة من المنتخب المصري، وكنا الأفضل طوال اللقاء، وده انعكس على الأداء والنتيجة”.
وذكر: ” مباراة إسبانيا أثبتت إننا نقدر نكون ند لند مع منتخبات كبيرة، وقدرنا نمسك الكرة بشكل كويس ونقدم أداء تكتيكي مميز، وكان ممكن نحقق الفوز”.
واختتم بدوي السيد “الكابتن حسام حسن أدي له 10 من 10، لأنه مدرب وطني وبيعشق البلد، وعنده روح قتالية كبيرة، وإن شاء الله منتخب مصر يقدر يعمل إنجاز كبير في كأس العالم ويوصل لأبعد نقطة ممكنة”.
