( ساعات ) .. شعر .. فؤاد حجاج

ساعات ياما

باحس بإني متغرَّب

وانا حواليه أهل وناس ..

واقول الغربه ليه قاسيه

وليه ظالمه

إذا ملكتنا م  الإحساس ..

تحس الوحده في ذاتك

ولا عارف بإيه جايلك

وإيه فاتك ؟ ..

تقيله رجل أوقاتك

وجوه الوقت تتساءل

أخد نفسي واطير .. أهرب ؟

ساعات ياما

باحس بإني متغرَّب

**

أيوب في صبرك ، ع الليالي والسنين

صبرك وفرَّع .. في الغنا .. حواديت

والصبر فات بالعمر غمضة عين

ورجعت تاني ، من بداية ما ابتديت ..

**

سندباد لف البراري

عاد وشايل عين ياليل

مركبه مال بيها صاري

سكته ملهاش دليل

ياغريب ..

لو يكون الحب شمعه

نورها حيقيد .. أد إيه ؟

لو رياح الظلم هبت

الضيا في الضلمه يسكت

قوللي يبقي .. باقي إيه ؟

ياغريب وانظر هلالك

في السما بيبدر في ضي

يسألك _ وبحزن _ مالك ؟

قوله إن الحلم جي

وتفسيره مالوش ولا زي

_ جي يهزم غربتك

 جوه نفسك .. والبيوت

  جي يصاحب سكتك

  يحمي نبضك م الهبوط ..

ياغريب

عود لدارك فيه هناك

ناس كتير تفهم لغاك

بالوما تعرف غناك

يحلموا زيك بمرسي

للمراكب فيها راسيه

والضيا ضد الخفوت

ياغريب .. جاي اصاحب سكتك

واحميها من داء السكوت

مفيش مهرب ..

وياما ساعات

باحس بإني متغرَّب