ضريح النور ..شعر .. عصام الدين صقر

ولسه باقى على الضريح ساعتين

طال الطريق م المحسمه لغاية شبين

مدد يا سيدى ابا العينين

مسافر وبيكى بتوَّنس

فى ونس تونس

يا بنت قلبى يا خضره

أنا فى التسابيح كما يونس

ورينى صورة فؤادى

ع الحيطه يا حداد

هز الهلال يا سيد

وشد يا شداد

أمد لحافى ف المدى

على قد رجل الشوق

انا رحال مكتفى بالعطش

يا ام القوام ممشوق

يوماتى برمى الصباح

على خدك البرقوق

ألاقى النور ساجد وبيصلى

وأول شمس ف عينيكى

شبت وطرحت كمنجه

وصوتك ع الشجر بيحضن المانجه

بحب فيكى الحياه

ورق الشجر قناديل

شاعر ضلوعه مراكب

تحضن اهات النيل

إضحكى يا حته من روحى

توب النهار بكسينى ويفيض

يا ام الدلال بوحى

هفرشلك الضى فوق الحزن عناقيد

ياما الليل شافنى ف منامه

وانا مستنى ضفايرك تسقينى

عارفه الشجر والسمك

الاتنين بيحبوا المايه

زى رموشك لما تسافر فيا

زى جدايل شعرك ديا

وانا شجرة ف حضن حنينك

سطر قصيده ف جملة شعرك

انا ريشه وحبك هو الريح

صحانى الكمسارى بصوت مستريح

انتهت رحلتى ووصلنا الضريح

وانتهو الساعتين ….

ــ