حبك عقد ابتدائي مثبتش ملكيه : شعر .. علي الصروي ــ

انتي بعتي واشتريتك

والبصمه ماشي هيه هيه

الشهود جميع جوارحك

والمهر غالي نور عينيه

العقار جوه قلبك

اربع اماكن مداريه

بطين حنان واوزين موده

والمشاعر معاه هديه

والصمام يفصل مابينهم

والنبض لمسه من ايديه

والحياه جواه بتسري

واتكسي بالنرجيسيه

والهوي بالمسك عطره

والمجالس مرجانيه

والبنفسج راحت حلاوته

بحمر الخدود المستحيه

يبقالي انا حق انتفاع من

دواعي الادميه

مستوفي انا كل الشروط

ويبقي ليه الاولويه

وماتسلميش من غير ضغوط

وحكمي عقلك شويه

وشرط الجزائي ماتنسيهوش

قلبي يموت ولا لوهشي ديه

كل ده تمهيد لعقدي

تصبح بنوده اجباريه

لما ابصم بالشفايف

عالخدود التفاحيه

وقاضينا يشعر بالحرج

ويطلب تأجيل القضيه

لإنها مش نفي وثبوت

او دواعى أمنيه

اوعدول عن انى اموت

وافدى كل الانسانيه

لان فيك شريان بيجرى

ودم عمره مايبقى ميه

حبر العقود كانت ملامحك

والمحاكم دنيويه

حتى الشهود رمشك وجرحك

وعشره كانت ميه ميه

وبرغم حبي ملوش حدود

وروحى ليك هانت عليا

بطلب من رب الوجود

يسعدك اجمل صبيه

ويعدلوا كل البنود

وتبقى المحاكم اخرويه

لان حبك كان ابتدائى

ماثبتشي ملكيه

ــ