“كنت عايز يوم القيامة يجي”،كهربا يكشف كواليس إضاعة ركلة الفوز أمام باتشوكا في الانتركونتيننتال

كتب ـ أحمد سعيد 

علق محمود كهربا لاعب النادي الأهلي، على كواليس إضاعة ركلة جزاء فوز المارد الأحمر، أمام باتشوكا في نصف نهائي كأس الانتركونتيننتال.

قال محمود كهربا عبر تصريحات إعلامية على قناة mbc مصر:”انا بعد ماتش باتشوكا اللعيبة خدت مني الموبايل، ومسحوا كل الابلكيشن عشان مشوفش حاجة”.

وأضاف كهربا:”وكنت حاسس اني عايز يوم القيامة يجي ودخلت خدت منوم، وقلت يارب ما اصحى ولغاية دلوقت مش عارف اتعافى من الماتش ده”.

وذكر:”رغم اني متعود على الضغوط بس عمري ما زعلت ولا هزعل زي يوم ماتش باتشوكا؛ لان كان نفسي افرح جمهور الاهلي ونوصل النهائي”.

وأوضح:” ساعة ضربة جزاء باتشوكا الشناوي قالي شوطها في النص الحارس مش هيقف في كرة حاسمة في نص الجون، وكنت داخل اشواطها في النص معرفش لغاية دلوقتى راحت كده ازاي”.

واختتم محمود كهربا تصريحاته :”والموضوع كان صعب بالنسبالي وكنت ممكن اعمل حاجة في نفسي اليوم ده”.

وخرج النادي الأهلي من نصف نهائي كأس الانتركونتيننتال بعد الخسارة أمام باتشوكا بركلات الترجيح بعد اضاعة كهربا وخالد عبد الفتاح وعمر كمال عبد الواحد.