كتبت – إيمان عمارة
واجهت الفنانة مي القاضي لانتقادات التي طالتها خلال الفترة الماضية، بسبب تقديمها شخصية راقصة في مسلسل “العتاولة 2″، والذي يعد بطولة الفنان أحمد السقا، والفنان طارق لطفي، والذي عُرض في السباق الرمضاني الماضي.
وذكرت “القاضي” في إحدى الندوات الفنية: “كنت متوقعة نجاح دوري ولكن اللي حصل كان أكتر من توقعاتي بكتير، ولكن مش أول مرة يتعمل دور راقصة في رمضان، يمكن المشاكل كانت في حاجات تانية وأنا كنت مبسوطة جدًا لما اتعرض عليّ الدور”.
وأضافت: “كنت عايزه أعمل تغيير ولكن مش للدرجة اللي طلع بيها مكنتش دي النية، ولا دي توقعاتي، ولما اتفرجت اتخضيت زيي زي الناس، بس تمام عدت، كانت فترة صعبة جدًا ومكنتش متوقعة الانتقادات تبقى بالدرجة دي، اللبس كان فيه حاجات زيادة ولكن خلاص زي ما كانت في انتقادات في ناس حبت ده”.
وتابعت: “الانتقادات دي وقتها تعبت لي نفسيتي جدًا، علشان أدواري دايمًا رقيقة الناس بيحبوني أوي، فبعد العتاولة كانت دي أول مرة اتشتم، هي حصلت لكل الناس بس كانت تقيلة وصعبة عليّ أوي”.
وأوضحت الفنانة أن والدتها حذرتها من ملابس شخصية الراقصة، قائلة: “أخدت رأي والدتي طبعًا ولكن هي حذرتني وقالت خلي بالك من اللبس، ولكني مش ندمانة على الدور يمكن الناس متقبلتهوش في رمضان وده موضوع تاني أو مش كل الناس بعض الناس، فممكن أعمله تاني ولكن مش دلوقتي، وهخلي بالي من حاجات كتير مش بس اللبس”.
