اتسرسبت ضحكه

صحيح عارفه مانيش أجمل

بنات الكون و لا الأروع

و لكن قلبي ليك مِجداف

ف دُنيا خَرسه ما بتسمع

وانا الخايفه

و انا الشايفه

و انا العارفه

بإن الحضن مني حياه

ومين غيري إليه تِرّجع

حقيقي الحسن بيداعب

عيون و قلوب

و ناس تعشق

وناس تبعد وناس بتدوب

و لكن شَكلي شئ تاني

وهمسه دافيه سَكناني

ما تتغرش ف زيف بودره

و ما تشوفشي

شروقي غروب

ساعات العين قوام تعشق

و يسهر قلب كام ليله

وعشق الجسم مش مبدأ

و لكن قلبي ضُليله

يحن عليك وهيطبطب

و لو شافك حزين يصّعب

عليه حالك وفيك يغّرق

يتوه وياك بدون حيله

شعر / محمد زكريا حبيش