كتبت ـ آلاء الدسوقي
كشف اللاعب أحمد الشافعي، لاعب نادي الزهور المطروحي “جوكر الشرقية”، عن بداياته في كرة القدم، وأهم المحطات في مسيرته، وطموحاته المستقبلية داخل وخارج الملعب.
في البداية قال أحمد الشافعي: “تدربت في أكاديمية كفر صقر مع الكابتن أحمد بنوي وأنا عندي 6 سنوات، ومن وقتها وأنا حلم حياتي أبقى لاعب كرة قدم كبير ومشهور ومحترف إن شاء الله”.
وأضاف: “والدي ووالدتي وخالي وجدي ربنا يرحمه هما أهم الناس اللي وقفوا جنبي بعد ربنا سبحانه وتعالى، وكمان كان ليّا فضل كبير من كباتن كبار زي شحاتة محمود، رشاد محمد، عادل مصطفى، وبدوي السيد”.
وتحدث عن أصعب مرحلة في مسيرته قائلاً: “كانت أصعب فترة لما جالي عروض من أندية مصر المقاصة والجونة والنجوم وأنا في اتحاد الشرطة ناشئين، والنادي كان متمسك بيا، وقتها زعلت جدًا لأني كنت حابب أبدأ دوري ممتاز بدري، لكن الحمد لله ربنا رزقني بالصبر”.
وتابع:”عديت المرحلة دي بالدعاء والاجتهاد، وكنت بشتغل على نفسي زيادة بعد التمرين، جرى وبطن وظهر وبلانك سبرنتات، ولما أروح البلد مكنتش بوقف تمرين، جيم وجرى طول الوقت، والحمد لله ربنا بيعوض دايمًا”.
وأوضح: “أكتر مركز برتاح فيه هو قلب الدفاع (المساك)؛لازم يكون فيه سرعة وقوة وذكاء تكتيكي حسب المركز اللي هيلعب فيه، ومن وجهة نظري حسام عبدالمجيد لاعب الزمالك من أفضل المدافعين”.
وواصل الشافعي “سيرجيو راموس هو مثلي الأعلى في كرة القدم”، وعن تشبيه أسلوبه بلاعبين آخرين قال: “في المساك بشبه نفسي بمحمد عبد المنعم، وفي الباك رايت أحمد فتحي، وفي الدفندر 6 محمد شوقي”.
وأشار”في بعض العروض الحمد لله، لكن لسه مفيش قرار نهائي، ومستني الأفضل إن شاء الله وربنا يختار اللي فيه الخير، نفسي ألعب للنادي الأهلي، واحترف خارج مصر، وأمثل منتخب مصر إن شاء الله”.
وذكر”أي لاعب شرف ليه يمثل منتخب مصر، وحلمي أشارك في كأس العالم إن شاء الله”، وأكد أن النجاح لا يأتي بسهولة، مفيش حاجة صعبة على ربنا، أهم حاجة الاجتهاد والسعي وترك النتيجة على الله”.
ولفت “الكابتن أشرف محمدين والكابتن أحمد أبو زيد والكابتن محمود برعي أبو الليل كان ليهم فضل كبير عليا، واتعلمت منهم كتير، وكلهم وقفوا جنبي وشجعوني أكمل”.
واختتم الشافعي رسالته للشباب: “نصيحتي لأي لاعب صغير، خليك قريب من ربنا، صلي وادعي واجتهد، واشتغل على نفسك داخل وخارج الملعب، ومفيش حاجة بعيدة عن ربنا. اهم حاجة متيأسش، واستمر في السعي وربنا هيكرمك ان شاء الله”.
