ناردين فرج: اقتبست شكل شخصيتي بـ صوت وصورة من مسلسل “The undoin”.. تفاصيل

كتبت – وفاء العسكري 

تحدثت الفنانة ناردين فرج، عن تفاصيل مشاركتها في مسلسل “صوت وصورة”، والذي عُرض خلال الفترة الماضية، وحققت خلاله نجاحًا كبيرًا بشخصية المحامية ماجدة علون، والتي لفتت أنظار الجمهور بستايل ملابسها وشعرها.

وقالت ناردين إنها اقتسبت ستايل شخصيتها في مسلسل صوت وصورة، من المسلسل الأمريكي “the undoing”.

وأوضحت: “لما قعدت مع المخرج محمود عبد التواب (توبة)، قالي اتفرجتي على مسلسل the undoing؟ ده مسلسل 7 حلقات بتاع نيكول كيدمان وهيو غرانت، وسألني على شخصية المحامية في المسلسل وأنا مكنتش فكراها، قالي اتفرجي عليها تاني”.

وأضافت: “الست دي كانت بتدافع عن هيو غرانت اللي خان مراته مع واحدة واتقتلت وشكوا فيه أن هو اللي قتلها، وهي كل همها تطلعه برئ حتى لو شاكة فيه، وقالي شوفي الست دي معندهاش قلب إزاي، وأنا خدت منها ستايل اللبس وحسيت أن ده بيدي شكل القوة”.

وعلقت نادرين فرج قائلة: “تسريحة شعري في مسلسل صوت وصورة جننت الناس، وأنا كنت قاصدة إني مغيرش شكلي، لأن الشخصية كانت محامية شيك وأنا فكرت فيها لاقيت أن مفيش حد فينا بيغير شعره في الحقيقة ومش بنغيره كتير، كل واحد فينا شخصيته في شعره ولبسه”.

وتابعت: “أنا حبيت إني أغير من شكلي كممثلة وأنا بعمل شعري كده في الصيف، وفي الأول قعدت مع المخرج كان عايزها شخصية صارمة وجامدة ومفيش عندها قلب، لاقيت أن لما أعمل شعري كده ده هيبين ملامح الوش أكتر وهيضيف للشخصية وشكلها، خاصة أنها ظاهرة طول الوقت في الشغل، ومكنتش مهتمة أن الشخصية يكون شكلها حلو ومختلف على قد ما أهتميت أني أبرز الشخصية”.