شعر : نبيل مصيلحي
ــ
صلوا ع الرسول الزين
النبي جد الحسنين
اللي قام نصحنا وقال :
إعقلهاااااا وتوَّكل ….!!
فمتسبهاش على الغارب
وع البحري وع المجنون
وفي الزحمه بتتلكع
وتتسكع
وتسهر حتى نص الليل
على القهوه
لغيت عقلك وإحساسك
وحاطط جزمه في راسك
وضارب بالنصيحه محيط
يا غافل بص شوف جارك
هنا وهناك
تلاقي الموت بيكنس كنس
بفيروس أد راس نمله
ما تستهونشي بالقِله
ساعات بتأش عمرك أش
فكون ناصح وطيع ربك
في أمر نبيك الأكرم
( كورونا ) موت ما يرحمشي
فصون نفسك
وصون أهلك
وصون بلدك
ولا تكونشي سبب موتهم
وبعد الموت مفيش فرصه لندم وعتاب
عشان خاطري استمع ليَّا
ولا تمشي في طريق
موبوء
ولا تكون عكس النباهه يا خووي
وتمشي عكس صح القول
كتير م الناس
بترمي عيالها في الشارع
مهيش خايفه
كتير م الناس بيحلالها
السلام بالبوس
كتير م الناس بتتفسح
في وسط الموت
يا عالم كنُّوا في بيتكوا
وشدوا حيلكوا في التطهير
وفي التنظيف وفي الحكمه
وخد بنصيحة الدكتور
وشيخ عارف أمور الدين
وقول يا رب نجينا
من الفيرس وم الأوباء
ياقادر يا كريم يا معين
وصلوا ع الرسول الزين
النبي جد الحسنين
