يا حبيبتي….
إنتي المدينة الكاملة
من غير سور…..
إنتي العباد و الليل
مشيئة ربنا ع الأرض
يا حبيبتي….
إنتي البحور و النور
و النار …..و الحقيقة الكامنة
في قلب الوليد…. وإنتي السر
إنتي الربيع الوحيد
ف عز يناير البردان
يا حبيبتي….
إنتي اكتمال الضد
في معني النواقص و النواقض
و الليالي الكامنة
في حضن دفاية إنجليزي
و بيت قديم
إنتي معزوفة لياني
لو كان عرف إنك حبيبتي
ما كان عزف…
أو كان عزف عن فكرته
و هاجر و سابنا لوحدنا
يا حبيبة …..
قبل ما تسافري هناك
سيبي تفاصيلك و ريحتك
سيبي باولو كويلو…
يكتبنا ف رواية
قبل ما تسافري بعمري
سيبي روحي…..
مع تفاصيلك شوية
خليني أسرق منها ضحكة
قبل ما تفارق….و أموت