كتبت – منة عوض
يعاني عدد من أهالي عزبة عودة بمركز منيا القمح من سوء حالة الطريق الرئيسي الذي يربط العزبة بباقي المناطق المجاورة.
في البداية يقول أحمد حمدي، الطريق مكسّر بقاله سنين طويلة ورغم إنهم بدأوا رصف جزء منه، إلا إنهم مكملوش الباقي بقالهم أكتر من 3 سنين، بنعاني كل يوم من الطين في الشتاء والغبار في الصيف.
أضاف عبد الكريم محمد مش بنطلب حاجة مستحيلة، بس نطلب استكمال رصف الطريق اللي بقاله كتير متوقف، وبقينا نعاني في كل تنقلاتنا الطريق ده حيوي لأنه بيخدم أهل العزبة والمناطق اللي حواليها.
استكمل منصور السيد أحد السائقين المحليين الطريق هنا مأساة، كل يوم نعدي فيه بنخسر في عربياتنا من الصيانة والتصليح، وبقينا نخاف نشتغل عليه، ده غير إننا بنتأخر دايمًا على زبايننا بسبب الحالة السيئة للطريق.
أضاف سائق آخر، محمد خيري : احنا مش عارفين نشتغل ولا نكسب لقمة عيشنا بسبب الطريق المكسّر، حتى الركاب بقوا يرفضوا يركبوا معانا لما يعرفوا إننا هنمشي في الطريق ده، لازم المسؤولين يتدخلوا ويحلو المشكلة دي في أسرع وقت.
يناشد الأهالي المسؤولين بسرعة التدخل لحل هذه المشكلة واستكمال رصف الطريق الذي طال انتظاره، خاصة مع اقتراب موسم الأمطار.
