كتبت تحية محمد
قامت سلوى بتقديم شكوى إلى محكمة الأسرة تطلب الخلع ،تقول سلوى أنا يدوب متزوجة من سنة و ثلاثة شهور، هو شافني فى عيادة دكتور كنت مع والدتى، أتكلم مع والدتى وأخذ عنوان البيت، وبعدين أتقدم، ل خطبتي، هو بيشتغل عمل إدارى بشركة خاصة، حسيت إن متقبلة أعيش معاه، وأهلي كمان وافقوا واتجوزنا بعد فترة خطوبة.
كانت زوجة أخوه تتدخل فى كل شئ، وقولت يمكن عشان والدته ست كبيرة فهى اللى بتتكلم، وهو محرج إنه يمنعها من الدخول فى تجهيزات الفرح وخلافه، لحد ما اتجوزنا وعشنا فى نفس البيت لكن كل شخص شقة لوحده، نتجمع طول اليوم عند حماتى فى الدور الأرضي.
علاقته مع سلفتي مش طبيعيه، حاسة إنها مش طبيعية، أى حاجة تحصل معاه يتكلم معاها، مضايق فرحان لازم هى تعرف أول واحدة، لدرجة إن فى حاجات تخصه بعرفها منها، ولما أواجه وأسأل يقول لى دى زوجه أخويا الكبير ،وأنا بثق فى رأيها، و واخد عليها من أول ما اتجوزت، على الرغم إنها أصغر منه فى السن.
لاحظت أن طول ما جوزها موجود مش بيتكلم معاها، لكن فى غيابه هزار وضحك بشكل زايد عن الحد، لحد ما بقيت مش قادرة أتحمل أعيش معاه بالشكل دا، وأنا جوايا إحساس إن فى علاقة بينه وبين زوجه أخوه.
العلاقة بينها وبين زوجي مريبة مش طبيعية، طول ما زوجها موجود زوجي مش بيتكلم معاها خالص، ولو كلمها عينه بتبقى فى الأرض، والكلام فى حدود، لكن طول ما هو مش موجود زوجي يكون معاها هزار وضحك.
طلبت منه يقطع علاقته معاها فى الكلام ورفض، وأنا مبقتش قادرة أعيش بالشكل دا وطلبت الطلاق، ورفض عشان كدا رفعت دعوى خلع، بمحكمة الأسرة و أنتظر حكم المحكمة.
