شعر : فهمي ريان
ــ
بِرَغم المِنَاهدَه . ورَغْمِ العِنَاد
ورَغم القَسَاوَة ورَغم البِعَاد
باشوفك ترُدِّى العِناد بالوِدَاد
وِدَايماً يا أُمِّى تِحِسِّى بهَمِّى
وتِدعِيلى يامَّا بقُرب المِيعَاد
واعُودلِك صُغَيَّر كَ يوم المِيلاد
مَلِيش غِيرِك انتِى. بِيِسهَر لِرَاحتي
ورَغم القَسَاوة باشوفِك سَامِحتِي
وِمين غِيرهَا أُمِّي يِدَاوِي الجِرَاح
ويِفرِد دِرَاعُه وفِى قَلبُه السَّمَاح
كِبِرت وجَافِيتك فَسامحِينى يامَّا
إذَا اشْتَد عُودِي وزَادِت وُعُودي
وكِتْرِت وُفُودى ف َعُودِي بحُضنِك.
وِعَارفِك وعُمرِك ما رَدِّيتي إِبنِك
ودَايماً كَرِيمه وِقَلبِك كِبِير
وعَطْفِك بَرَاح للصغير والكِبِير
وفَاكِر نَصَايحِك وخُوفِك عَلَيَّا
تِحِبِّيني اسَمَّع نُصُوصهُم شِوَيَّه
وانا لِسَّه فى الَّلفه ليه تكشِفُوه ؟
وسَمُّوا الإِلَه قبل لمَّا تشُوفُوه
وبتقولي دَايماً دَا أَحلَي من ابُوه
وعارف أَبُويا بِيعنِيلِك ايه .
حيَاتِك وفِكرِك وكُل انشِغَالِك
وسَنَدِك وضَهرِك وضِلِّك ومَالِك
وخُوفِك عَلَيا لَو العَب فى شَارِع
مِسَانداني وتقُولي مَوهُوب وبَارع
ولِعَبِى وكُتُبِي ومَصرُوف دِرَاستِي
وِرَغم انشِغَالِك لكِنِّك غَرَستِى
فى قَلبِي المَحَبَّه وفى رُوحِى الحَياه
ولَهفِةْ عِينيكِي لَو انْطَق بِ آه
وسَهرانَه ليا بِتِدعي الإلَه
وانا نَايِم احلَم بِبُوجِي وطَمْطَمْ
وباتشَاقَى وازْعَل وبَاشتِم وابَرطَم
وِبَاكبَر وتِكبَر مَعَايا الحِيَل
وبِتشِيلى وتزِيد عَلِيكي الشِيَل
ما عُمرك يا غَاليَه فى مَرَّه اشتَكِيتي
ضِحِكتِي لعينَيَّا ولِوَحدِك بَكِيتي
عَشاني يا غَاليه تِضَحِّي بِرَاحتِك
وتقتِلني ١٠٠ أَلف مَرَّه صَراحتِك
وصِدقِك معَايا يا أَطهَر مَلاك
أنَا نِفسِى اقَرَّب طَرِيقي هَلَاك
ومَشغُول تَمَلِّلي وعُمرِى بيِجري
وِعُودك بِيِحني واقُول لِسَّة بَدري
وفَاكِر يا أُمِّي وعُمرِي ما نَاسى
فى كام مَرَّة سِبتِك لوَحدك تقَاسِى
يا خِلِّي وصَاحبِي وأَهلِي ونَاسي
باحِبك يا أُمِّى باحِبك ورَبي
وباشهد صياغتِك لكِلمِة تِرَبي
يباركلي فِيكي ويبارك فى عُمرِك
ويخليني ليكي واعِيش تحت أمرِك
يا أَجمَل مَلَاك قد تَجَسَّدْ بَشَر
يا قلبى وعَقلي ونُور البَصَرْ . …
ــ
