بقلم تحية محمد
كان زمان وزمان كان
تنام ف البيت والأبواب مفتوحة بكل امان
وست البيت تعمل من روث المواشي
وقود اشهى والذ طعام
تسهر عند الساقية بالليل لوحدك معاك الرحمن
تاكل دهون اللحوم وجلود الطيور
وتشرب السمن البلدي بالفنجان
مفيش امراض مستعصية ولا حاجة اسمها سرطان
الأمهات يعملوا البسكوت وكعك العيد
ف البيت ف ليالي رمضان
لو قامت حريقة ف البلد
مفيش مطافى و يطفيها الجدعان
كان زمان الحب والشهامة والرجولة
والعفاف همه العنوان
وتشرب الحليب سخن من الجاموسة
قبل الشمس ما تشرق ع الأوطان
كان زمان تنام ويمر من جنبك التعبان
ولا يعضك لأنه شبعان
كان زمان فيه الصقر والنسر و الغراب
و الحداية و البومة وابو قردان
كان زمان يحترم الذئب الكلب الذي يحرس الأغنام
زمان السوبر ماركات تسمي دكاكين والقرص
تسمي بكاكين وتطلع رحمة ونور
ف المناسبات الدينيه ع المتوفيين للمساكين
والشتاء مطره كتير وبرده قليل
وسببه بناء البيوت بالطين
والصيف لطيف وحره خفيف
وهوا العصاري جميل وعليل
زمان لعيبة كورة موهوبين بالفطرة
ملهمش مثال وعباقرة ف كل مجال
زمان كانت الجمال تحمل المحاصيل و الأثقال
ومثال للعزيمة وتعلم من صبرها اجيال
كان زمان يحفر الرجال اساس العمارة ب الكريك و الفاس
وتشوف الكلوو ف ايديهم وده الرجولة عنوان واساس
وست البيت تغسل الملابس ف الطشت وكان اسمه
تصبين أيدها تظل ناعمة ك الميلامين وارقى م الألماس
وتحمل ع راسها البلاص ويجلس مائل
وملئ بالماء ولا احسن ترمومتر حساس
كان زمان الطعمية اسمها فلافل والقمح اسمه غلة
و الإبرة امها مسلة ومحدش يغتاب حد ويقول احنا بنتسلي
زمان كانت العيلة تتناول الطعام مع بعضها ع الطبلية
وده كان سبب اساسي ورئيسي
ف الترابط الاسري وحسن التربية
وتجد القطط جالسة بإحترام ومنتظرة نصيبها ف الطعام
كان زمان الطبيب اسمه حكيم والبريد اسمه بوسطة
و السواق اسمه اسطي و الحلاق اسمه مزين
و الكوافيره اسمها ماشطة
و الفطار رقاق ناعم وجبنة فلاحي وعسل و قشطة
والناس ف هنا وسعادة ومبسوطين اخر بسطة
زمان مفيش مبيدات زراعية ولا مزارع سمكية
والطعام طبيعي مية المية وشرب المية م الحنفية
والكل عايش سعيد وسليم وعايش عيشة هنية .
