كتبت – نرمين صقر
كشفت الفنانة جيهان الشماشرجي، عن كواليس مشاركتها في مسلسل “كامل العدد الجزء الثاني”، مشيرة إلى أنها اعتذرت عن المشاركة في الجزء الثالث.
وتحدثت جيهان الشماشرجي في لقاء إذاعي: “أول ما قالوا لي فيه جزء ثاني كنت واثقة إنه هيكون حلو ويعجب الناس، لأني واثقة في كتابة رنا أبو ريش ويسر طاهر وخالد الحلفاوي”.
وتابعت: “وكنت مطمنة ولما جالي الاسكربت حسيت إنه تحفة والجزء الثاني أحلى من الأول، واعتذرت عن الجزء الثالث وهما مكملين، إن شاء الله يكسر الدنيا أكتر من التاني والأول”.
وعن الكواليس تحدثت قائلة: “الكواليس كانت لذيدة جدًا والأطفال كانوا عاملين جو رهيب وروح حلوة، وإحنا كتيم كلنا كنا فاهمين بعض وطول الوقت بنضحك، وده اللوكيشن الوحيد اللي عمري ما شفت فيه شد أو المخرج بيزعق”
وأضافت: “وخالد الحلفاوي عنده صبر رهيب، وكنت بقوله لو أنا قاعدة مع كم العيال دي ممكن أشد شعري، لكن هو بيتعامل براحة وبيسايس الأطفال خاصة إنه أب وفاهم سيكولوجية الأطفال”.
وصرحت جيهان الشماشرجي أنها لا تفهم في التكنولوجيا والتعامل مع مواقع التواصل الاجتماعي، قائلة: “لينا وجيسكا كانوا دايمًا في الكواليس بيعملوا تيك توك، وأنا معرفش إيه التيك توك وكل اللي أعرفه أني بجيب الفيديو اللي منزلاه على إنستجرام أنزله على التيك توك”.
وتابعت: “ومعرفش إيه سناب شات مثلًا، وكتير حاولوا يشرحولي لكن حاسة إني كبرت أو مش بحب التكنولوجيا، وهما شاطرين أوي في الموضوع ده”.
وأكدت جيهان الشماشرجي أنها تتلقى تعليقات كثيرة وتفاعل من قبل السيدات على أدوارها، كما يسألونها دومًا عن روتين شعرها، قائلة: “بستحمى وبسرحه وبغسله لكن مفيش ورتين، وبتبسط بتفاعل الستات بحس أنهم بيعاملوني كأني واحدة منهم”.
