كتبت – أسماء حليمة
تحدثت الفنانة جومانا مراد عن مهرجان القاهرة للدراما، معبرة عن سعادتها الشديدة بوجودها في المهرجان حيث أشارت إلى أنها معتادة على وجود مهرجانات سينمائية وليست درامية كما هو بمهرجان القاهرة للدراما.
وقالت جومانا خلال لقائها تلفزيوني: “الدراما شيء مهم جدًا وأنا ابتديت دراما وسعيدة بتواجدي بمهرجان الدراما وبقى فيه مهرجان للدراما ودايمًا متعودة على مهرجانات للسينما مش للدراما وبقول للناس لازم تيجو العلمين والساحل، وسعيدة بالحضور الكبير للفنانين والتنظيم في غاية الجمال، وسعيدة إن دكتور يحيى الفخراني رئيس المهرجان والحمد لله”.
وأضافت: “بقالي 16 أو 18 سنة بشارك في الدراما المصرية وليا تاريخ فيها، دايمًا بقول كلنا اتربينا على الدراما المصرية ودراما فارضة نفسها وبقوة وهي الأساسية اللي نشأنا عليها ومبسوطة بالتنوع والتطور اللي بيحصل فيها دلوقتي، وتقنية تصوير المسلسلات بقيت سينمائية واختلفت عن دراما زمان ويمكن بقى فيه جرأة في الطرح ومنصات ومحطات أكتر بتبسط بالنجاح ده وبكل ما فيه محطات ومنصات أكتر وتبقى الحركة الفنية كبيرة من كتاب وممثلين ده كله بيساهم في إثراء الدراما”.
وتنتظر الفنانة جومانا عرض مسلسلها الجديد “مفترق طرق”، حيث تحدثت عنه قائلة: “فيه حاجات كتير معروضة بس أنا في إجازة، ومستنية في شهر سبتمبر الحالي هينزل مسلسل بقالنا فترة عاملينه مفترق طرق، وهند صبري وإياد نصار وماجد المصري، وإن شاء الله يحقق نجاح كبير”.
