كتب / حسين فتحى :
أعربت الجماهير الغفيرة للشرقية عن سعادتها الغامرة بتولى رجل الأعمال أحمد فؤاد أباظة عضو مجلس النواب عن دائرة أبو حماد رعاية وإستثمار الفريق الأول لكرة القدم بعد صعوده للدورى الممتاز لقدرته على إحتفاظ الفريق بمقعده بل ومنافسة الكبار فى المعترك الكبير ولكنها أبدت تخوفها الشديد من وجود محمد شيحة الذى حصل على “الضوء الأخضر” من المستثمر وللأسف فقد إستغله بطريقة خاطئة بعد أن أطاح باللاعبين القدامى الذين ساهموا فى صعود الفريق وعددهم 9 لاعبين بجانب 4 لاعبين تم التعاقد معهم من أندية القسم الثانى و4 لاعبين من أندية الدورى الممتاز بجانب الإطاحة بالجهاز الفنى بقيادة أيمن المزين من أجل تغليب مصلحته الشخصية وإستفادته المالية على مصلحة الفريق وإستمراره فى الدورى الممتاز !
فيقول أحمد عطية : يعنى 9 ﻻعيبة من أفضل لاعيبة فى مصر وأصحاب فضل فى الصعود بقى لهم 3 شهور معاك ومضوا على بياض وبيتدربوا .. تيجى بعد ما معظم الفرق قفلت القايمة تقولهم معلش مالكوش مكان ؟ ده يرضى مين ده ؟ والكابتن أيمن المزين اللى رفض عروض من أندية براتب أكبر من الشرقية وفضل تقولوا معلش أقعد فى بيتكم عشان تجيب مدرب مرتزقة بتاع عموﻻت ! وأحب أقول لمجلس الإدارة إنتم مضيتم عقد رعاية بس إنتم أصحاب المسئولية وبلاش تحولوا النادى لعزبة “شيحة” اللى مطرود من ناديه الإسماعيلى وبقى رئيس نادى الشرقية وبيتحكم فى كل حاجة.. الظلم وحش وﻻعيبة الشرقية التسعة ﻻعيبة “رجالة” مش مرتزقة بتلف على الأندية زى اللى شيحة هيجيبهم لينا والظاهر كده إنه هيغرقنا زى ما غرق المحلة وزى ما جاب مدربين “مغمورين” من الإسماعيلية فى الجهاز الفنى هيجيب لينا لعيبته “البايرة” واللى مش لاقية نادى تلعب فيه ويمشى وﻻد البلد اللى قلبهم على الفريق وعلى البلد ومن الآخر كده ..عزبة شيحة هتغرق البلد !
ويقول محمود ماهر : أنا مش ضد رحيل أي لاعب عن الفريق إذا وفروا لاعب أفضل من الموجود لأن دي مصلحة فريق بيمثل محافظة لكن أنا ضد الطريقة الساذجة دي ماينفعش ناس صعدتنا وتكريماً ليهم نرميهم في وقت زي دا كل الأندية تعاقدت وخلصت واستقرت واللاعيبة دي تقعد في بيوتها رداً للجميل .. يعني مثلاً لاعب زى محمود أسماعيل “رامبو” كان انبي عاوزينه والمجلس رفض وإتمسك بيه لو مشي دلوقتي مش هيروح إنبي تاني لأن زمانهم جابوا لاعب مكانه !
ويقول سعيد جمعه “كبير مشجعى الشرقية” شيحة عمل الشرقية تلاجة للعيبة اللى ماتوا وبطلوا كورة ولا إيه؟ وجاى يعمل علينا فيلم”إسماعيلية رايح جاى” وأنا بقوله ياشيحة الشرقية مش اسماعيلية علشان تجيب لنا لاعبين مبطلين كورة وسايب ولاد البلد أنا كراجل”كبير مشجعين” أشجع مين بعد ماكل واحد يركب عربيته ويمشى بعد كل ماتش ؟ ولا النادى بقى كله”سبوبة” لكل من هب ودب .. تجيب مدرب زى طارق يحيى كلنا معاك لكن تجيب لنا مدربين من اسماعيلية إحنا مش معاك لأن البلد فيها مدربين أقوى من اللى إنت جايبهم .. وللعلم إحنا مش هنسكت ولو هييجى على عمرنا ولازم ولاد البلد لاعبين ومدربين يكون ليهم مكان فى الفريق والتشكيل لأن دول اللى هيخافوا على البلد وهما اللى فرحونا ولولاهم مكنتش جيت لا إنت ولاغيرك وياترى المستثمر إبن الشرقية أحمد أباظة هيوافق على ده ولا سلملك الراية ومشى عشان تقضيها “بيزنس” ؟ وإزاى وكيل لاعبين يكون مسيطرعلى تكوين فريق وهو عاوز يسوق بضاعته يعنى يدبسنا فيها ويخلع ؟
ويقول محمد عبدالرحمن “ماندو” : حرام والله ولاد البلد يشيلوا الطين ويضحوا علشان الصعود وبعدين يمشوا ويجيب واحد زي حمام إبراهيم اللى مسك تدريب فريق أبوصوير ثلاث مبارايات وطردوه وبعدها مسك فريق درجة تالتة مع العلم عندنا أحسن منه وخبرتهم أعلى منه زى الكابتن محمد أسماعيل اللى بيعتبر سفير للشرقية فى السعودية وحاصل على الرخصة ( A ) والكابتن مصطفى مزيكا اللى كان واحد من اللى صعدوا الفريق واللاعبين ولاد البلد اللى هيموتوا علشان الفريق في الملعب أمثال أحمد عبدالغنى اللى كان فى إتحاد الشرطة يمشوا إزاى ؟هو ده التكريم للناس اللى تعبت وعرضت حياتها للموت ولأخر دقيقة كانوا بيلعبوا علشان يصعدوا الفريق وبعد الصعود تم إختيارهم ومن رمضان وهما بيتدربوا صباحا ومساءا ويصحوا من الساعة 5 صباحا علشان يطلعوا الجبل وبعد شهر وأكتر تدريب مع الفريق ومعهم المدرب العام ابن البلد و أقدم إداري في كرة القدم الكابتن علاء مختار نقولهم مع السلامة في شرع مين ده ؟ ربنا كبير وعمره ما يرضي بالظلم .. ونحب نقولهم أنتم رجالة وهتفضلوا طول عمركم رجالة وحقكم مش هيضيع حتى ولو بعد سنين !!
ويقول كمال محمد : المستثمر قالها أنا مابفهمش في الكورة وجايب اللي يفهم فيها والمقصود باللي يفهم فيها شيحه وزى ماقلت ده هيدبسنا في البضاعة بتاعته جايب جهازإسمعلاوى وناس ماسمعناش عنها كمدربين وولاد البلد ليسوا أقل منهم وعلي فكرة هيكون قلبهم على النادى أكتر .. وإحنا صبرنا كتير وأنا واحد زهقت بصراحة من العك اللي بيحصل مع إني كنت باتكلم بأسلوب النصيحة وأهدى الأمور لكن فعلا النادى في خطر على الأقل لو هنهبط يبقى مانخسرش لأن أصحاب الفضل في صعودنا بعد ربنا اللاعيبة اللي كانت هتموت مع الجماهير في أبوصوير وشوف اللاعيبة وبوستتها وحزنها اللي ناشرينه على مواقع التواصل الإجتماعى (الفيس بوك) زى عصام عادل وحازم شعيب ومحمد مشمش اللاعيبة دى كانت هتموت علشان النادى مع باقي زملائهم اللي مشيوا ودلوقتي بنرد لهم الجميل علشان شوية “موظفين” هيطلعوا على المسرح زى ماقال “حازم شعيب” وعجبني المعني بصراحة .. ناس تتعب وناس تستعرض وميهمهاش الإ إنها تقبض ووكيل لاعبين هيسوق لاعبيته اللي متعاقد معاهم علشان يكسب من الطرفين المستثمر واللاعب وللأسف فتفويض أباظة لشيحة بتكوين الفريق يدل علي إنه غير فاهم لأمور الكورة ومش بس كده الأمور الإدارية كمان المفروض لجنة فنية من النادى عبارة عن مدير فني يحدد لك إحتياجاته وإحتياجات الفريق وتكلف سماسرة أو تتفاوض مباشرة مع الأندية .. الفلوس الآن متوفرة بس مش نحصر الموضوع علي فرد وكمان سمسار لاعبين ! إحنا شقينا علشان النادى كتير ومش هنسكت علي اللي بيحصل وإحنا إذا كنا خارج مصر ومش قادرين نكون مع الفريق برضه هنلاقى طرق كتيرة للمساعدة فى إنقاذ النادى من أى حد يحاول يوقعه !
