كتبت – إنچي حسام
تحدثت بدرية طلبة خلال تصريحات لها قائلة: “نجمة بحجم ياسمين لما بمثل معاها وبحترم وقفتها قدامي أوي وأكون خايفة أقول حاجة، تقولي لي في إيه ما تقولي وتضربني، وتقول لي يا بت ما تقولي ساكتة ليه وأنا بكون محرجة، وبتقف تخدم عليا وتفرشي لي وأنا أرمي علشان كده ببدع معاها”.
وأضافت بدرية طلبة وتحدثت عن السبب وراء تعاونها مع الفنانة ياسمين عبد العزيز في أكثر من عمل، وسر الكيمياء بينهما.
وتابعت بدرية طلبة: “بتعمل ده مع كل اللي بتحبهم أو اللي بتتفائل بوجودهم في العمل أو حابة وجودهم معاها، زي أنا وإيمان السيد أو حسن عبد الفتاح، فدايما إحنا معاها في تلات أرباع شغلها”.
وتابعت موضحة: “فمعنى كده أن البني آدمة دي بتجيب الناس اللي بيعلموا حاجة كويسة، علشان يقفوا قصادها علشان هي واثقة من نفسها، وهي باسمها ده كله مش عاوزاني أقل منها بتكون عاوزاني أعلى منها”.
وفي سياق متصل، تحدثت بدرية طلبة عن كواليس فيلم حصل خير قائلة: “كنا بنقعد في أوضة واحدة في البريك كأننا في سينما ومحمد رمضان بيحكي بدايته وكلنا واقعين في الأرض من الضحك، شوية ونتنقل في أوضة كريم ويحصل مهازل، والكواليس لما تكون حلوة الجمهور بيشوف العمل حلو، لأن الراحة النفسية بتخليني مبسوطة قدام الكاميرا، الموضوع أبسط من كده إنك تطلع حابب اللي حواليك ودماغك تكون ماشية مع دماغهم”.
