كتبت – أسماء عبدالمقصود
أعرب حبيب عن سعادته الكبيرة بإعادة عرض فيلم حب البنات، في سينما زاوية بمناسبة عيد الحب، حيث أن صالة العرض امتلأت بالشباب الذي دخل معهم في حوار عقب انتهاء الفيلم.
وكتب السيناريست تامر حبيب، عبر حسابه الشخصي بموقع إنستجرام: “كانوا عاملين عرض لفيلم حب البنات بمناسبة عيد الحب، ومشكورين جدًا طلبوا مني أروح أحضر الفيلم”.
وتابع تامر حبيب: “عملولي لقاء مع الجمهور بعد الفيلم ما خلص، والجمهور اللي كان مالي كل كراسي القاعة ومافيش كرسي فاضي، كانت طبعًا أغلبيتهم العظمى من البنات ويمكن 90 ٪ منهم كانوا أطفال أو لسة ماتولدوش لما الفيلم أتعرض أول مرة في 2004”.
وأضاف “حبيب”: “مهما وصفت مش هقدر أعبر عن شعوري اللي حسيته من أول الفيلم ما بدأ لغاية دلوقتي حالًا، وروح وبهجة وطاقة الشباب وهما بيحاوروني بعد الفيلم كانوا مخليني عايز أسجد شكرًا لربنا على أنه أنعم عليا بإحساس ماحستوش من زمان”.
وواصل تامر: “أنا كنت قاعد وسط مجموعة من الشباب فاتحين عليا هويس حب وبهجة بجد ما تتوصفش”.
وأكمل السيناريست: “أنا راجع من العرض ده طاير من السعادة والبهجة وحاسس بنشوة لا تضاهيها نشوة، والشباب كانوا بيسمعوا الحوار مع الفيلم وهو شغال”.
وتابع: “الشباب كانوا بيصفقوا مع ظهور الممثلين كأننا في مسرح، وبيغنوا ويرقصوا مع كل كلمة في كل أغنية في الفيلم، وفاجئوني بتصفيق مدوي بعد الفيلم ما خلص كأنهم كانوا في مسرحية لعادل إمام”.
و جدير بالذكر أن فيلم “حب البنات” شارك فيه مجموعة من الفنانين منهم، ليلى علوي، حنان ترك، خالد أبو النجا، أحمد عز، هنا شيحة، أشرف عبد الباقي، والعمل من تأليف نهاد عبد العزيز، وإخراج خالد الحجر.
