كتبت – بسمة غربية
ظهرت الفنانة إلهام شاهين، كضيفة مع الإعلامية فاطمة مصطفى، في برنامجها “الراديو بيضحك” عبر إذاعة الراديو 9090، وتحدثت في اللقاء عن مشوارها الفني، موضحةً أنها لم تفكر من قبل في اعتزال الفن.
وقالت إلهام خلال اللقاء: “أنا بحترم أوي تاريخ المرأة المصرية لأنه أقوى تاريخ للمرأة في الكون، وأول امرأة تحكم في التاريخ هي الملكة حتشبسوت”.
وتابعت الفنانة: “يسري الجندي الكاتب جابلي مسلسل عن شجرة الدر وقالوا الأعمال التاريخية بتتكلف كتير أوي ومعرفناش نعمله، زي فيلم حتشبسوت”.
وأردفت إلهام: “مش ممكن أكون راضية 100% عن كل ما قدمته، وبدايتي كانت قوية جدًا وأفلامي كانت من أهم الأفلام في السينما المصرية، وفي فترة كان بيجيلي فيها أفلام كتير أكيد كان في إخفاقات، ولكن حتى الغلط بتعلم منه، وعارفة إن إمكانياتي أكبر من ده”.
وأكملت الفنانة: “رسالة فيلم موت سميرة بكرها أوي، وبزعل من نفسي جدًا لما أفتكر إني عملت الفيلم ده، والفيلم ده كان إساءة للملحن الكبير بليغ حمدي وأنا بعشقه، وأنا كنت صغيرة في السن وقت ما قدمت الفيلم، وعيب إن إحنا قدمناه، وعيب إن مصر عملته”.
واستكملت إلهام: “إحنا اهتمامنها بما هو تافه، ومحدش بيركز في ندوات المهرجانات الفنية، يعني المهرجانات بتعمل كتب عن السينما والفنانيين المكرمين، وكل الاهتمام بيكون على اللي اتكعبلت وكل ما هو تافه، وده في كل المهرجانات”.
وقالت إلهام شاهين: “أنا مبتابعش السوشيال ميديا، ووجودي عليها بسبب تحركاتي والمهرجانات اللي بحضرها، أنا واخدة الجانب الإيجابي، وخدت حقن بتاعة سكر علشان أخس وده مش صح، وكل الأدوية بتاعة التخسيس خدتها وتعبتني، وروحت لدكتور بيعمل أجهزة لشد الجسم لأني مش رياضية، والأدوية سدت نفسي ومباقتش أكل خالص”.
وتابعت الفنانة: “أنا قدمت كل نوعيات الأدوار ومبقاش في جديد، بقى يجيلي أدوار مكررة مع إن الأعمال حلوة أوي، وممكن يكون غيري من النجمات عمله وأنا عايزة أكون جديدة ومفاجأة”.
وأكملت إلهام شاهين: “قلت لو مجاليش أدوار جديدة ممكن أبعد وميهمنيش أقعد في البيت، مش اعتزال لأني عمري ما فكرت في الاعتزال، لكن أوقف لغاية ما ييجي الجديد، أدواري الأخيرة ما حدش قدمها غيري كنجمات”.
واختتمت الفنانة حديثها قائلةً: “دوري في مسلسل بطلوع الروح كقائد الكتيبة النسائية لداعش كان مفاجأة ليا وللجمهور، أنا بتطرق لموضوعات ممكن غيري للنجمات يخافوا منها، أدوار جريئة ومفيدة”.
